مازن
22-02-2011, 10:01 PM
كان يا ما كان بقديم الزمان وسالف العصر والأوان لحتى كان .....
كان في وحدة اسمها حوّا .... وكانت حوّا ما عندها لاشغلة ولا مشغلة إلا القعدة على الشبابيك والفرجة عالجيران ....
وبيوم من ذات الإيام كانت حوّا واقفة عالشباك قامت شافت السّقا عم يبوس الجارة ... قامت قالت لحالها ...حوّا خانم لقيت كار ... رضت الله ورضت الجار ...
المهم حوّا حملت حالها ونزلت لعند الجارة .....
دقت عليها الباب وقالتلها جاية أشرب عندك فنجان قهوة ....
وفعلاً قعدوا بأرض الديار جنب البحرة عم يشربو القهوة .... وكانت الجارة عندها كم بطة عم يحوصوا(1) بأرض الديار ....
قالت حوّا لجارتها ..انتي بطاتك ما بيحكوا ... استغربت الجارة كتير ... قالتلها : لا والله ..
قالتلها حوّا : والله أنا بطاتي بيحكوا كومة حكي .....
قالتلها الجارة تعلميلي بطاتي الحكي . وبعطيكي على كل وحدة 25 ليرة ( وكانت ال25 ليرة بهديك الإيام تحكي )
المهم والله حوّا قبلت وأخدت البطات معها وراحت عالبيت ...وكل يومين تلاتة تدبح بطة وتاكلها ...هيك لحتا خلصوا .... حملت حالها وراحت لعند الجارة ....
قالتلها الجارة ...شو طمنينا صارو البطات يحكو ....
قالتلها حوا : يوه لكان .. صاروا يقولوا : حئا بئا(2) باسا السقّا ...
قالتلها الجارة: يوه يخربيتون (3).... شلون هيك عم يحكوا ... ما بدي ياهون ... خديون انتي ....
قاللتها حوّا : يوه شو بدي أعمل فيون ..... ما بدي ياهون ...
قامت الجارة عطتها فوق كل بطة 25 ليرة تانية مشان تقبل تاخدهون ...
طلعت حوا من عند الجارة وهي عم تقول :
حوّا خانم لقيت كار ..... رضت الله ورضت الجار ...
بعد كم يوم .... كانت حوا ماشية بالطريق قامت شافت جنازة .....
سألت عنها قالولها هي جنازة ولد صغير ... قامت راحت لعند أهل الولد وصارت تبكي ....وقالتلون أنو زوجها توفى ... وقالولها أنو حلال تنزل معو ولد صغير بالقبر مشان يستغفرلو... وطلبت منهون تاخد الميت وتدفنو مع جوزها ....
أهل الميت وافقوا على هالطلب من كتر ما نشقت(4) وبكيت ....
والله حوّا أخدت هالولد الميت ...ولفتو بلفة ولد صغير وحملتو على إيدها ونزلت عالسوق .....
وقفت عند محل كتير معروف بالسوق ...وبلشت تقلو نزلي من هي القماشة ..وعطيني من هديك القماشة ...وقطعلي من هي ...وهي عم تنأي أتقل القمايش وأغلاها ....المهم وقت صار وقت الدفع ...مدت إيدها على جزدانها .... وشهقت ... قالتلوا للبياع ... والله يمكن نسيانة جزداني بالبيت ... رح نط لعند جوزي ليكو محلو هون ...و جيب المصاري ... خليلي هالولد عندك لبين ما أرجع .... وحطت هالولد عند التاجر ومشيت ....
وقفت بعيد شوي وصارت تستنى ... هاد التاجر ... طولت عليه المخلوقة ... واستغرب أنو هالولد ما فتح تمو كل هالوقت ... اجا بدو يرفعلو عن وشو ليشوفو . لسا ما قرب إيدو منو كانت حوّا خانم قدحت ولييييييييييي.. قتلي الولد ...مدري شو عمل بالولد ....
وصارت تولول وتعيط حتى لمّت عليها أهل السوق ....
أهل السوق بيعرفوا التاجر منيح ...وسمعتو للزلمة متل المسك ... المهم صاروا بدون يسكتوها بأي طريقة ... ناولوها القمايش يلي منقيتون ... وبلشوا يلي يعطيها مصاري ...ويلي يعطيها بضاعة ... هيك لحتى سكتت ومشيت وهي عم تقول ....
حوّا خانم لقيت كار ..... رضت الله ورضت الجار ....
بعد كم يوم كانت حوّا عم تتمشى قامت شافت ناس مجتمعين ....
سألت ودقدست (5) .... عرفت أنو في جماعة ابنهن صارلو غايب برات البلد عشر سنين وما بيعرفوا عنو شي ... وجديد بعتلون مرسال أنو جاية بعد كم يوم .... الجماعة طاير عقلون ومبسوطين والناس جاية عم تهنيهون ...
المهم ... حوا خانم متل العادة راحت عالبيت زبطت حالها ...وضبت شنتاية إلها ...وأخدت كم قماشة من يلي أخدتهون من السوق ....وراحت لعند الجماعة ....
دقت الباب .... فتحولها ... مو بيت فلان ... إي والله ... مين حضرتك ...
قالتلون ... مو أنتو ابنكن فلان يلي مسافر للبلد الفلانية ( وذكرتلون شوية تفاصيل عرفتها عنو )
قالولها ...إي والله بس ما تعرفنا ... قالتلون .... أنا مرت ابنكن ...بعتني قبلو وهو جاية بعد يومين ... قال مشان جهز حالي مشان حفلة العرس ....لأنو هو حابب أنو تستقبلو بحفلة عرس ....وشرحتلون أنو هنن صارلهون متزوجين كم يوم ... وانوهي يلي قالتلو ما بدنا نتغرب خلينا نرجع عالبلد ... ومن هالحكي ....
المهم والله حوّا خانم مزوقة ... فتحت هالشنتاية تبعها وبلشت ... هي الشقفة اشتهيتها لحماتي ... وهي القطعة اشتهيتها لبنت احمايي فلانة .... وبكم شغلة من هالشغلات بلفتهون (6) ...وخلتهون يحبوها ....
وبلشو تحضيرات حفلة العرس .....ويوم العرس ظبطت حالها ولبست هالبدلة البيضا ....بس قبل ما تنصمد قالتلون ... انو ابنهن شاريلها دهب كتير ... بس ما خلّاها تجيبهون معها ... لأنو خاف عليها ... قلها دبري حالك من عند أمي وأخواتي ...وبس لأجي منتفاهم .... لأنو مو حلوة العروس تنصمد بدون دهب ...يعني بس على عيون العالم ...
المهم والله بنات حماها وحماتها ما قصروا ... يلي يجابتلها الفرطات تبعاتها ... ويلي جابتلها المباريم (7) ...ويلي لبّستها مطيف الألماس ... وهيك ... مشان ابنهن ... لأنو مو حلوة الو غايب هالمدة وما يكون ملبس العروس منيح ....
والله هالعروس انصمدت وبلّش الدق والرقص .... بجية الولد من السفر استقبلوا أهلو ورحبوا فيه وقالوا عروستك عم تستناك جوا ...
هاد الزلمة فكر أهلو عاملينلو ياها مفاجأة ....والله ما حكا شي فات وانصمد جنب العروس ...
شافها ما بها شي .... عجبتو .... قلها شو اسمك .... قالتلو : زلغطوا ... قلها غريب هالاسم ....
المهم هي بعد شوي ... قالتلو : أنا بدي قوم فوت عالحمام ...
حملت حالها وفركتها (8) ...
هاد العريس طولت عليه العروس ....
صار كل شوي يناديلها لأمو ويقلها : زلغطوا ؟؟
أمه تبلش .... أوهاااا... للييشششششش...
بيرجع ويقول لأختو ... أختي زلغطوا ؟؟ طبعاً أختو تزلغط ....
بعدين قالتلو أمو لك أبني والله اتشرطت حناكنا (9) من الزلغطة ...
قلها أمي عم أسألك عن العروس يلي خطبتولي ياها ....
استغربوا كلهون ... قالولو ... ليش مو مرتك ... قلهن ...لاء مو انتو خاطبينها ...
وبلشوا يلي تقول دهباتي ..ويلي تقول فرطاتي ...
حوّا خانم صارت ببيتها وهي عم تقول ....
حوّا خانم لقيت كار ..... رضت الله ورضت الجار .
وتوتة توتة خلصت الحدوتة .
شرح المفردات :
(1) يحوصوا : يمشون بغير هدى ...
(2) حئا بئا : كلام بلا معنى...
(3) يخربيتون : مسبة بمعنى خرب الله بيتك ..
(4) نشقت : بكيت مع اصدار أصوات مزعجة .
(5) دقدست: دقدس يدقدس يعنى بحث وتحرى (من تحت لتحت )
(6) بلفتهون : من بلف فلان فلاناً :سحره بمعسول الكلام
(7) المباريم : نوع من أنواع الأساور ...بيحبو النسوان الكبار في السن .. ودارج في تلبيسة العروس في مدينة حماه
(8) فركتها : يعني هربت.
(9) اتشرطوا حناكنا : تعبير يقال عند كثرة الصراخ ...وأحياناً يستخدم بعد التثاؤب..
كان في وحدة اسمها حوّا .... وكانت حوّا ما عندها لاشغلة ولا مشغلة إلا القعدة على الشبابيك والفرجة عالجيران ....
وبيوم من ذات الإيام كانت حوّا واقفة عالشباك قامت شافت السّقا عم يبوس الجارة ... قامت قالت لحالها ...حوّا خانم لقيت كار ... رضت الله ورضت الجار ...
المهم حوّا حملت حالها ونزلت لعند الجارة .....
دقت عليها الباب وقالتلها جاية أشرب عندك فنجان قهوة ....
وفعلاً قعدوا بأرض الديار جنب البحرة عم يشربو القهوة .... وكانت الجارة عندها كم بطة عم يحوصوا(1) بأرض الديار ....
قالت حوّا لجارتها ..انتي بطاتك ما بيحكوا ... استغربت الجارة كتير ... قالتلها : لا والله ..
قالتلها حوّا : والله أنا بطاتي بيحكوا كومة حكي .....
قالتلها الجارة تعلميلي بطاتي الحكي . وبعطيكي على كل وحدة 25 ليرة ( وكانت ال25 ليرة بهديك الإيام تحكي )
المهم والله حوّا قبلت وأخدت البطات معها وراحت عالبيت ...وكل يومين تلاتة تدبح بطة وتاكلها ...هيك لحتا خلصوا .... حملت حالها وراحت لعند الجارة ....
قالتلها الجارة ...شو طمنينا صارو البطات يحكو ....
قالتلها حوا : يوه لكان .. صاروا يقولوا : حئا بئا(2) باسا السقّا ...
قالتلها الجارة: يوه يخربيتون (3).... شلون هيك عم يحكوا ... ما بدي ياهون ... خديون انتي ....
قاللتها حوّا : يوه شو بدي أعمل فيون ..... ما بدي ياهون ...
قامت الجارة عطتها فوق كل بطة 25 ليرة تانية مشان تقبل تاخدهون ...
طلعت حوا من عند الجارة وهي عم تقول :
حوّا خانم لقيت كار ..... رضت الله ورضت الجار ...
بعد كم يوم .... كانت حوا ماشية بالطريق قامت شافت جنازة .....
سألت عنها قالولها هي جنازة ولد صغير ... قامت راحت لعند أهل الولد وصارت تبكي ....وقالتلون أنو زوجها توفى ... وقالولها أنو حلال تنزل معو ولد صغير بالقبر مشان يستغفرلو... وطلبت منهون تاخد الميت وتدفنو مع جوزها ....
أهل الميت وافقوا على هالطلب من كتر ما نشقت(4) وبكيت ....
والله حوّا أخدت هالولد الميت ...ولفتو بلفة ولد صغير وحملتو على إيدها ونزلت عالسوق .....
وقفت عند محل كتير معروف بالسوق ...وبلشت تقلو نزلي من هي القماشة ..وعطيني من هديك القماشة ...وقطعلي من هي ...وهي عم تنأي أتقل القمايش وأغلاها ....المهم وقت صار وقت الدفع ...مدت إيدها على جزدانها .... وشهقت ... قالتلوا للبياع ... والله يمكن نسيانة جزداني بالبيت ... رح نط لعند جوزي ليكو محلو هون ...و جيب المصاري ... خليلي هالولد عندك لبين ما أرجع .... وحطت هالولد عند التاجر ومشيت ....
وقفت بعيد شوي وصارت تستنى ... هاد التاجر ... طولت عليه المخلوقة ... واستغرب أنو هالولد ما فتح تمو كل هالوقت ... اجا بدو يرفعلو عن وشو ليشوفو . لسا ما قرب إيدو منو كانت حوّا خانم قدحت ولييييييييييي.. قتلي الولد ...مدري شو عمل بالولد ....
وصارت تولول وتعيط حتى لمّت عليها أهل السوق ....
أهل السوق بيعرفوا التاجر منيح ...وسمعتو للزلمة متل المسك ... المهم صاروا بدون يسكتوها بأي طريقة ... ناولوها القمايش يلي منقيتون ... وبلشوا يلي يعطيها مصاري ...ويلي يعطيها بضاعة ... هيك لحتى سكتت ومشيت وهي عم تقول ....
حوّا خانم لقيت كار ..... رضت الله ورضت الجار ....
بعد كم يوم كانت حوّا عم تتمشى قامت شافت ناس مجتمعين ....
سألت ودقدست (5) .... عرفت أنو في جماعة ابنهن صارلو غايب برات البلد عشر سنين وما بيعرفوا عنو شي ... وجديد بعتلون مرسال أنو جاية بعد كم يوم .... الجماعة طاير عقلون ومبسوطين والناس جاية عم تهنيهون ...
المهم ... حوا خانم متل العادة راحت عالبيت زبطت حالها ...وضبت شنتاية إلها ...وأخدت كم قماشة من يلي أخدتهون من السوق ....وراحت لعند الجماعة ....
دقت الباب .... فتحولها ... مو بيت فلان ... إي والله ... مين حضرتك ...
قالتلون ... مو أنتو ابنكن فلان يلي مسافر للبلد الفلانية ( وذكرتلون شوية تفاصيل عرفتها عنو )
قالولها ...إي والله بس ما تعرفنا ... قالتلون .... أنا مرت ابنكن ...بعتني قبلو وهو جاية بعد يومين ... قال مشان جهز حالي مشان حفلة العرس ....لأنو هو حابب أنو تستقبلو بحفلة عرس ....وشرحتلون أنو هنن صارلهون متزوجين كم يوم ... وانوهي يلي قالتلو ما بدنا نتغرب خلينا نرجع عالبلد ... ومن هالحكي ....
المهم والله حوّا خانم مزوقة ... فتحت هالشنتاية تبعها وبلشت ... هي الشقفة اشتهيتها لحماتي ... وهي القطعة اشتهيتها لبنت احمايي فلانة .... وبكم شغلة من هالشغلات بلفتهون (6) ...وخلتهون يحبوها ....
وبلشو تحضيرات حفلة العرس .....ويوم العرس ظبطت حالها ولبست هالبدلة البيضا ....بس قبل ما تنصمد قالتلون ... انو ابنهن شاريلها دهب كتير ... بس ما خلّاها تجيبهون معها ... لأنو خاف عليها ... قلها دبري حالك من عند أمي وأخواتي ...وبس لأجي منتفاهم .... لأنو مو حلوة العروس تنصمد بدون دهب ...يعني بس على عيون العالم ...
المهم والله بنات حماها وحماتها ما قصروا ... يلي يجابتلها الفرطات تبعاتها ... ويلي جابتلها المباريم (7) ...ويلي لبّستها مطيف الألماس ... وهيك ... مشان ابنهن ... لأنو مو حلوة الو غايب هالمدة وما يكون ملبس العروس منيح ....
والله هالعروس انصمدت وبلّش الدق والرقص .... بجية الولد من السفر استقبلوا أهلو ورحبوا فيه وقالوا عروستك عم تستناك جوا ...
هاد الزلمة فكر أهلو عاملينلو ياها مفاجأة ....والله ما حكا شي فات وانصمد جنب العروس ...
شافها ما بها شي .... عجبتو .... قلها شو اسمك .... قالتلو : زلغطوا ... قلها غريب هالاسم ....
المهم هي بعد شوي ... قالتلو : أنا بدي قوم فوت عالحمام ...
حملت حالها وفركتها (8) ...
هاد العريس طولت عليه العروس ....
صار كل شوي يناديلها لأمو ويقلها : زلغطوا ؟؟
أمه تبلش .... أوهاااا... للييشششششش...
بيرجع ويقول لأختو ... أختي زلغطوا ؟؟ طبعاً أختو تزلغط ....
بعدين قالتلو أمو لك أبني والله اتشرطت حناكنا (9) من الزلغطة ...
قلها أمي عم أسألك عن العروس يلي خطبتولي ياها ....
استغربوا كلهون ... قالولو ... ليش مو مرتك ... قلهن ...لاء مو انتو خاطبينها ...
وبلشوا يلي تقول دهباتي ..ويلي تقول فرطاتي ...
حوّا خانم صارت ببيتها وهي عم تقول ....
حوّا خانم لقيت كار ..... رضت الله ورضت الجار .
وتوتة توتة خلصت الحدوتة .
شرح المفردات :
(1) يحوصوا : يمشون بغير هدى ...
(2) حئا بئا : كلام بلا معنى...
(3) يخربيتون : مسبة بمعنى خرب الله بيتك ..
(4) نشقت : بكيت مع اصدار أصوات مزعجة .
(5) دقدست: دقدس يدقدس يعنى بحث وتحرى (من تحت لتحت )
(6) بلفتهون : من بلف فلان فلاناً :سحره بمعسول الكلام
(7) المباريم : نوع من أنواع الأساور ...بيحبو النسوان الكبار في السن .. ودارج في تلبيسة العروس في مدينة حماه
(8) فركتها : يعني هربت.
(9) اتشرطوا حناكنا : تعبير يقال عند كثرة الصراخ ...وأحياناً يستخدم بعد التثاؤب..